美式漢堡包以大件頭見稱，眼見個個包、三文治都高4、5吋，餡料層層叠，堆到座山咁，引得人口水流，食唔食得晒？若然一個人能獨吞如此「巨山」，話唔定有潛質挑戰小林尊。而大大份的甜品，唔怕肥可以獨食，不過一班朋友「眾樂樂」當然更開心。

半溶芝士下是8安士牛肉漢堡，之下還有生菜、番茄、洋葱、醃菜、煙肉、蘑菇層層叠；漢堡扒一口咬下，肉汁唧出，好似𡁻緊件牛扒，放頂的半生熟煎蛋更是一絕，把包面稍稍壓下，蛋黃便沿邊流往下層。咬落個包，有爽口蔬菜、脆口煙肉、Juicy漢堡扒，還有陣陣蛋香，口感豐富極！

公司三文治未算多餡，MainSt.Deli供應的傳統美式三文治才是真正的餡料豐富，黑椒牛肉、燒牛肉、火雞肉、酸椰菜及芝士，淨餡厚度足有2吋，加埋底面兩塊烘得香脆的稞麥麵包，入口有不同「肉感」，黑椒牛香、燒牛有𡁻頭、火雞肉唔嚡，食肉獸必選！

餐廳餐牌上最重的甜品，足有2.5磅，用上78%法國名牌朱古力Valrhona，由外層的朱古力漿、到內裏一層相間的朱古力慕絲及朱古力蛋糕，每一口都是香濃的朱古力味，着實有點膩，但又好滿足，唉，食朱古力甜品就係咁矛盾。

Size大得如一磅裝蛋糕，外層是焗至微脆的蛋糕，一刀劏開，朱古力醬像熔岩般湧出來，熱蛋糕拌着冰凍的呍呢拿雪糕同食，一冷一熱，口感特別，而且雪糕可減低朱古力蛋糕的甜膩感。

咁大個梳乎厘，擔心內裏焗得成、外層就過燶，不過大廚的功夫實在了得，外層焗到少少脆，內裏蛋白食落有些少似燉蛋，香滑但質感濕潤，好鬆軟，值得等30分鐘。有朱古力、薑、香橙、呍呢拿等味道可以揀，一端上桌必要第一時間品嘗，涼了塌了便失真。

我都係女仔，好明白「又要食，又怕肥」呢種矛盾的心情，於是乎同一種食物有大細Size分，一定會揀細，可能最終食多幾件重肥。不過縮水版的賣相確實比正常Size精緻，而味道亦Keep到水準，最啱用嚟過口癮。

別看它細細個，但製作同樣認真，脹卜卜的包仔上沾滿芝麻，夾住一小角漢堡扒兼塗上茄醬，最感動是那小片酸青瓜，沒有了它，便沒有了那陣酸酸哋的味道，還算得上是漢堡包嗎？

雖然用的一般香腸，沒有真正熱狗腸那種腸衣脆、肉汁多的口感，但包仔內的酸青瓜粒沙律醬、兩小片番茄，還有包面擠得幼細的沙律醬，味道及賣相都與一般熱狗似到足。

海皇粥店一口氣推出3款Ｑ版油器，當中以牛脷酥最過癮，縮水後都無走樣，之不過細極都要分兩啖先至食得晒一個；Ｑ版煎堆外皮煙韌，不過，還是愛原裝Size又薄又脆的質感。至於鹹煎餅，都是一個炸得外層脆脆哋的麵粉糰，但可選配牛油汁或香草忌廉汁，中西合璧，配搭創新。
供應時間：星期一至五2:30pm-6:00pm

（a） MainSt.Deli（23751133）
尖沙嘴北京道8號朗廷酒店地庫
（b） TheSTEAKHOUSEwinebar&grill（27211211內線2405）
尖沙嘴梳士巴利道18號香港洲際酒店大堂低座
（c） RIVA（28393327）
銅鑼灣告士打道310號柏寧酒店27樓
（d） simplybread（23666319）
尖沙嘴金馬倫道14號A地下
（e） 海皇粥店（28906827）
銅鑼灣東角道24-26號怡東商場4-5號地下