昨日港股早段作勢上衝，原本以為恒指可即日企穩21400點。此水平聚集頗大的期權盤，會是短期阻力，但若能攻克，則將出現急升態勢。不過A股回調，以及市場憂慮聯儲局主席伯南克又要演講，令升幅收窄，圖表上連續三日出現「十字星」。現時仍是待變格局，但走勢已算穩妥，只是樂觀之餘仍要睇實一些重要技術位，向下的防線為21000至21200點的上升裂口。
大市近期成交萎縮，表面看是缺少資金流入，但真正原因應該是市況太飄忽，炒家難以應付，無論是炒輪抑或炒正股的散戶，皆已離場，導致成交不振。市況飄忽的原因，當然是受伯南克的「彈弓口」所影響。早前炒退市，接着又炒唔退住，昨晚會否又炒返退市？真係好似開字花。而最重要，就是過去數周的起起跌跌，已令大部份投資者失去信心而離場，或許這就是後市要升的主要原因。