「如何面對，曾一起走過的日子？」呢十年，白鴿黨起起跌跌，噚日推出相片集紀念過去十年民主路。八方揭開本相集都感慨良多，80年代匯點成立，張炳良、楊森同劉迺強當年係青年才俊，同許家屯影相，𠵱家四人各行各路。

匯點同港同盟合併後，民主黨喺95年立法局選舉大勝，阿牛當時當選入局，着三件頭西裝打呔去開會，𠵱家阿牛退黨，重返街頭，好少打呔咯。張文睇番十年前嘅相都好欷歔，歲月催人真係唔到你話事，好多相中人好多頭髮，𠵱家就甩嘅甩、白嘅白，肥仔明原來都試過好瀟湘，𠵱家同其他戰友一樣，頂住個肚腩，好難搣得甩嘞。
睇完本相集，有人可能覺得好遺憾，吳明欽同歐玉霞分別喺92年同07年病逝；令人哭笑不得嘅係，86年高山大會至今，香港民主發展好似無寸進。白鴿黨今次總共印咗1,300本相集，每本100蚊。20萬印刷費由副主席單仲偕科水，黨內「歌神」林子健則「聲演」劉華唱主題曲《一起走過的日子》，佢改寫歌詞，改得幾好，唱得仲好，噚日喺中環記者會時即場唱歌，好多中環人拍手掌。