【咁啱嘅】皇馬3子撞日做老襯 原來係集體智慧?
結婚艾華路莫拉達高華錫盧卡斯華斯基斯西甲.皇家馬德里
莫拉達(左起)、高華錫同華斯基斯三pair愛侶,嚟緊周五、六拉埋天窗啦!
有冇發現近排好多球壇人士同另一半拉埋天窗,好似紐亞、舒尼達連、域陀華迪斯甚至些路迪領隊羅渣士?不過,講巧合都唔夠皇家馬德里3位球員:艾華路莫拉達、盧卡斯華斯基斯同高華錫,竟然咁啱得咁橋喺嚟緊禮拜五同六齊齊「做老襯」!首先係莫拉達同女友Alice Campello周五喺威尼斯成婚,緊接華斯基斯周六同Macarena就會喺馬德里附近城鎮Majadahonda行禮,高華錫同日亦會喺克羅地亞家鄉迎娶Izabel Andrijanic,點知由於撞晒期,大部份皇馬隊友只能夠「踩兩場」,到賀莫拉達同華斯基斯,高華錫就只得同胞莫迪歷等捧場。
唔通外國都有結婚吉日呢家嘢?西班牙《馬卡報》就話佢哋約埋做人夫唔係巧合,而係去年底思前想後齊齊揀中呢個周末,貪佢喺球季完結後,行完婚禮仲有時間度蜜月先歸隊備戰新球季,所以球星們趁呢個時間結婚,分分鐘係集體智慧!