本地時裝設計師鄧達智前年底與外科醫生陳梓欣（Clement）撻着，拍拖半年即公開同性戀情，更火速訂婚，並於去年9月在香港擺喜宴，約200親友齊送上祝福，不過兩人尚欠一紙婚書。當時鄧達智已透露二人計劃會在今年，去英國補辦註冊簽名，正式成為同性夫妻。

鄧達智與Clement的簽紙註冊儀式於香港時間昨晚9時舉行，即倫敦當地時間下午2時。鄧達智提早兩日已到倫敦與友人開派對，而Clement昨日早上才由曼徹斯特轉機往倫敦，並火速到友人家中裝身。一對新人以一黑一白結婚禮服，穿上白色Paul Smith全白禮服的Clement互相為大家綁煲呔，二人還忍不住咀嘴，之後出發前往Chelsea Old Town Hall簽紙。Clement手持代表大愛的彩虹色花球，之後在附近的Pub舉行慶祝派對，約有40多人出席。約8時許，名股評人「青姐」胡孟青、前廣管局成員孫郁標及當地親友已到齊觀禮。

一對新人在出發英國前受訪，鄧達智坦言緊張，笑言有婚前恐懼症：「好忐忑，我啲職業係多嘢諗，鍾意諗嘢，希望陳醫生明白。我係一就係三，三就係四，從來未覺得自己咁白癡過。」反而Clement就自言此刻心情平淡：「都決定咗一齊喇，反而家好期待，最後嘅一次度蜜月，我哋遊山玩水都差唔多一年。」二人透露原本是計劃去旅行，但有朋友提議在英國簽紙，便臨時決定行禮，之後度蜜月，會去挪威沿海峽灣行山、冰島浸溫泉，再去意大利酒莊及到南部的陽光海灘，估計結婚加旅行會花費20萬。
過
鄧達智曾表示從來沒想過行到結婚簽紙這一步，問到簽紙後會有甚麼改變，他表示：「希望再過一啲自然啲嘅生活，唔要有太大壓力。大家年紀都唔細，明白人與人之間唔好『老奉』囉，唔好有咗個名份，就理所當然，我亦唔會再關注世俗眼光點睇。我哋識咗兩年，到今日對佢嘅感覺都係好正嘅！係我眼中嘅小鮮肉嚟嘅！」在旁的Clement即面紅：「我唔鮮㗎喇，四十幾歲㗎喇。總之，簽紙之前之後，我都係同一句：『我會永遠陪住。我愛你。』」

鄧達智來自新界屏山鄧氏第二十六代，家族輩份頗高，近年宣佈出櫃，去年7月與拍拖約一年的Clement訂婚，曾備受鄉親壓力，鄧達智更不惜放棄近億祖業家產，改遺書留予姪兒。
採訪：林妙萍