現年20歲、來自多倫多嘅Kelly Ng(伍樂怡)，青春無敵，一去初選，由於外貌似「姑姑」李若彤，散出氣質，已令觀眾留下深刻印象(新聞連結： http://bit.ly/2sKByso )，點知噚晚大熱倒灶，Kelly三甲不入，唔少網民戥佢覺得可惜，喺Ig留言問Kelly入唔入娛圈、會唔會拍劇，讚Kelly已經係「民選」冠軍。

Kelly下午喺Ig貼咗一張相，留言：「一大早起來看到很多窩心的留言和信息，好多謝大家一路以來的支持。這趟旅程總算完滿結束了。雖然未能獲獎，但對自己整體的表現總算有所交待了。能有這機會穿上這麼華麗的晚裝，感受過台前幕後的所有，認識了這麼多朋友，還得到了支持我的人的認同，我已經好滿足。人生就是要不斷這樣為自己迎來挑戰才有趣味。我都好期待為自己人生繼續寫上精彩的故事。」

唔少網民回覆「盡咗力就無悔」、「從初選就開始關注你，你真的很棒，加油」、「有冇搞錯呀！你攞唔到三甲」、「老土啲講，你係心目中冠軍，加油，直播再見」、「如果今年都係民選港姐，你早就入3甲，可惜今年唔係觀眾選」、「真是戥你不值，你是很有氣質的一個港姐！你有點李嘉欣同鍾嘉欣嘅氣質」。

另有網民有啲陰謀論去睇覺得TVB係想盡快請Kelly入行，所以唔可以俾獎Kelly，寫道：「如果唔係要過冷河一年。況且，你一早已經係冠軍。希望可以好快喺電視上見到你。」亦有網民鼓勵「你值得擁有更多冠軍，唔一定係Miss HK，希望以後會喺演藝圈見到你嘅出現，創造更多嘅成就」、「雖然你沒得冠軍，可是你的前途一定一片光明。因為你有靚樣+觀眾緣。」