林敏驄入行35年作品展演唱會今晚繼續喺紅館舉行，去帶埋老婆袁詠儀（靚靚）去捧場嘅張智霖（Chilam）被阿驄拉咗上台。當時阿驄自彈鋼琴兼自唱《當我想起你》，唱到一半，阿驄走去台邊捉Chilam上台唱歌。

Chilam一上台就同大家打招呼：「Hello，大家好。其實林敏驄老師未寫過歌畀我。」正以為阿驄會應承佢、促成合作，點知阿驄話：「未夠班呀！我未夠班！」講完，Chilam就跟住唱埋嗰半隻《當我想起你》。

之後Chilam話有問題問阿驄，佢話：「我細個問啲先生都解答唔到。」
阿驄：「啲先生好渣呀！」
Chilam：「係啦，咁嘅，即係『迷失中的我閉起眼呆坐痴痴的凝望遠海』，咁閉上眼又點痴痴的凝望呀？」
阿驄：「黐筋呀你，閉上眼會打番開o架嘛！」
Chilam：「原來係咁，呢個疑團終於解開咗。」
阿驄：「咁你唱埋呢首歌先走啦，你做你嘅嘢，我去陪坐，攰呀，陪吓你啲屋企人！」
之後阿驄行去坐喺靚靚隔籬，靚靚同阿驄玩selfie，Chilam即笑謂：「你係第一個拎到selfie，唔使等通知喎！」

另外，劉浩龍（師兄）表演完後離開紅館，問到佢有有受噚日冧台事件影響心情，佢話：「有啲擔心，噚日整頭時收到消息，有同行受傷都唔想，但今日個騷順利好多。」再問到阿驄心情如何，師兄話：「喺明星足球隊識咗阿驄好耐，好少見到佢咁，唔開心亦有啲內疚，好沉重，亦有反問如果係喺自己個騷發生呢啲事，亦都會唔開心。」咁有冇安慰阿驄？師兄話：「我哋男人呢啲，拍一拍膊頭就係。（佢心情有冇好啲？）有，但仍然要沉實應戰。」