巴塞隆拿前鋒美斯同曼城射手阿古路響禮拜二晚嘅歐聯齊齊「戴帽」真係威水!美斯入三球後打破前輩魯爾嘅紀錄,以74個士哥成為歐聯史上嘅入球王;阿古路上演帽子戲法,就將曼城響出局邊緣掹返嚟,要踢埋最後一輪分組賽至知可唔可以晉級16強。查實美斯上個禮拜六先破完西甲嘅入波紀錄,唔使幾日又做埋歐聯入球王,真係唔講得笑。至於曼城雖然贏波,但形勢都係唔樂觀,因為即使最後一輪作客贏羅馬,萬一拜仁慕尼黑響主場竟然爆冷輸畀莫斯科中央陸軍,曼城響同分嘅情況下,都會因為對賽成績唔及CSKA,無得踢入淘汰賽。所以比歷連尼求神拜佛都要希望拜仁生生性性至好,然後自己隊波就搏老命鍊贏羅馬,如果唔係就講乜都無用。
【現場直播】雨傘革命: http://umbrella.appledaily.com
YouTube: http://bit.ly/umbrellalive