仲有兩個禮拜，現屆立法會就收爐。立法會主席梁君彥就決定收爐嗰個周五（7月17日）擺番幾圍，請秘書處嘅仝人食飯，當係慰勞佢哋。其實以前立法會收爐，仲有「記者同樂日」同埋「告別議案」呢兩個傳統，不過今時今日，仲邊度有人有咁嘅興致呢？

秘書處今日出信話，梁君彥會喺17日於立法會宴會廳設宴，向秘書處職員表達謝意，同時邀請全體議員出席。都啱嘅，呢4年梁君彥要秘書處啃咗咁多鑊，不過有心嘅就請得豪啲，同埋最緊要係自費，唔好開公數。

話時話，以前立法會去到最後一次會議，都會有一項由議員提出嘅「告別議案」，基本上就係畀議員暢所欲言，內容不限。不過呢個「傳統」，由前一屆立法會開始經已冇咗，今年亦唔例外，況且立法會仲有「暢所欲言」呢回事咩？

至於「記者同樂日」就去到上屆立法會都仲有，今屆立法會就一直未有聲氣，聽講亦冇人提過要再搞。

-----------------------------
蘋果25年系列ebook《讀果》上架：紀實現場 、世界前線 、逆權之路 、叱吒風雲 、守護真相
-----------------------------
反送中一周年，《蘋果》整理大量涉及警察濫暴濫權等資料，製成詳盡資料庫，請按此閱讀圖表版本 ／純文字版本
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
App內1-Click訂閱《蘋果動新聞》
按此了解更多