馮盈盈同何廣沛今日喺鑽石山出席活動，講到佢哋分別角逐飛躍進步男、女藝員，馮盈盈笑住表示唔記得投票，仲自嘲係佛系候選者，得獎與否，一切隨緣；何廣沛就話日前參與公司嘅盆菜宴，趁機為自己拉票，佢亦希望馬德鐘得到視帝，以及《跳躍生命線》獲最佳劇集。有冇叫緋聞女友朱晨麗投票？何廣沛話：「我都冇見過佢。」

對於早前馮盈盈同醫生男友寶寶去咗日本旅行，一副冧樣嘅佢表示：「叉足電，好難得大家都放假，我哋第一次喺冰天雪地去旅行，喺雪地旁邊浸溫泉，又喺漫天飄雪中一齊散步。」何廣沛忍唔住問：「咩尺度嘅浸溫泉？」馮盈盈表示係《3日2夜》嗰啲浸溫泉。何廣沛瞪大對眼話：「浸咗3日2夜？浸到甩皮喎！」追問係咪冇着衫浸？馮盈盈話：「我哋跟番日本傳統，不過我哋有毛巾，我都以為可以全裸，點知跑到出去，寶寶見到遠少少，有馬路有車經過，所以佢叫我坐番低，包番條毛巾，今晚如果攞到好成績就再post其他相。」

精選娛聞，喺晒《娛果》
http://fb.com/appledailyent