佳士得倫敦將於6月17至30日舉行「二十世紀藝術周」,27日則會舉辦「印象派及現代藝術」晚間拍賣,會以藝術大師巴布羅.畢加索於1934年嘅油畫《寫信的女人(瑪麗-德雷莎)》為領拍作品,估價達2,500萬至4,000萬英鎊(即2.5億至4億港元),同場仲有印象派大師莫奈嘅《垂柳》,估價1,500萬至2,500萬英鎊(約1.5億至2.5億港元)。公眾今明兩日可到香港佳士得藝廊預約觀賞億元名畫。
而其中《寫信的女人(瑪麗-德雷莎)》首度喺亞洲亮相,作品創於1934年3月26日巴黎布瓦杰魯古堡,畫中嘅女子係畢加索嘅情人瑪麗-德雷莎.華特(1927年邂逅畢加索時只有17歲),佢坐喺窗邊一張華麗嘅啡色皮革椅子上寫信,陽光灑入凸顯出佢輪廓線條。
佳士得印象派及現代藝術部門高級副總裁暨資深總監何杏淇指,畢加索筆下有唔少女性,繪畫瑪麗-德雷莎時係用簡單構圖同弧形線條,以突出其圓臉及性感魅力,並充滿歡欣同幸福嘅氣息。