首先，我反對《逃犯條例》。其次，我唔會問大家星期日去唔去遊行，而係問星期日大家帶幾多人去遊行。再來，習大大話特朗普係朋友，中美關係輕微緩和說不定幫逃犯條例帶來一絲曙光。

大媽在公園跳老舞，有左膠說這是活潑的基層文化，結果是淪為釣狗公阿叔的公眾賣淫，甚至有阿伯大媽廣場睇人跳老舞突然暴斃。死在大媽羅綺裙下，做鬼也風流。香港的公眾空間被入侵，政治社會運動不停反噬，總有一堆精英視而不見；事不關己嘛，又或者很單向滑坡至中環價值的結論 -「搵到錢住好少少，咪遠離大媽囉」、「搞政治運動係搵唔到錢的失敗者」、「眼界睇遠點啦」之類。好啦，現在逃犯條例殺過來，不分你我貧賤，一起送中，共享成為大灣區人的榮耀，你們還有甚麼話好說？

我相信，精英貴族上流都有自覺反醒。做一個簡單思想實驗，你會唔會覺得禿鷹曾偉雄去聯合國打工怪怪的；但十多年前，你反而覺得陳馮富珍為世界公共衛生出力是勝任有餘？如果你覺得一切很合理無問題，先恭喜你，你是大灣區不可多得的人才，未來十年在祖國紅太陽照耀下會穩步上位。如果你會覺得惴惴不安，不妨再想多幾秒鐘，看看問題出在哪兒。

冰封三尺非一日之寒，國際勢力已慢慢放棄香港，今次重現八國聯軍，多國領事一起反對送中，甚至軟性搵代理人出言恐嚇要資本市場上杯葛香港中國，商業上取消獨立貿易關稅優惠，未來只怕要簽證，出國移民就業都成問題。

香港跟國際的連繫正慢慢失去。吊詭在香港本來就是國際都會，但這十幾年，中國卻教我們如何成為國際都會，我們不論金融還是經濟上都過度依賴單一經濟體。孟子曰：「人之患在好為人師。」內地說要怎樣做，我們回歸後只是照辦煮碗去跟，路越來越遠，結果連我們的國際性格都失去掉，失卻國際影響力。

身邊很多人都去過外國讀書，炫耀外地生活工作經驗，但只見形相，內涵上不見得跟國際扯上多大關係。葉公好龍，狐假虎威，這班人回流香港後只恃著浸過鹹水的身份搵中國錢，靠攏內地投機；學者亦然，原來讀國際關係最後都係返大灣區搵食，慘哉。這班人掏盡社會資源，得天獨厚，卻沒有充份利用去建構香港和國際間的聯繫，甚至推銷香港，讓國際社會了解香港。

近期最令國際社會關心香港的人是難民黃台仰李東昇，他們學歷不特別好，但書寫流利英文在國際媒體登報，以略好於陳偉霆的英文口音跟人權組織和政黨交流香港慘況。心底裡我不覺得他們是精英，但他們是在幫香港人重塑國際關注，幫香港跟國際交流。他們做的事，壇數和層次比浸鹹水的精英高幾班。

現在社交圈狂轟移民話題，講點走、幾時走、走去邊等話題已令人心煩。雖然係咁，總好過有朝要淪落到跟黃台仰請教難民心得，或交流如何學習德文。

渾水
專業投資者、上市公司執行董事、90後

-----------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX