永和海鮮酒家點解咁受街坊支持？喺西貢大嘅茶客陳生大讚永和夠晒抵食，兩公婆飲茶，30幾蚊已可埋單，假日亦唔加價。老闆劉玉靈話，對上一次加價已經係年幾兩年前嘅事，茶錢都只係4蚊位，加一個17蚊盅頭飯，21蚊就夠飽。

除咗夠抵食，陳先生話，嚟呢度最重要都係人情味，而唔係食物嘅味道。佢講笑話：「有時啲嘢唔好食，我哋仲大大聲喝老細：『點解咁難食㗎』！」佢形容呢度好似屋企咁，每個星期總有三四日會嚟，而每次去差唔多隔籬都有啲街坊老友喺度，噚日關門，佢都覺得好落寞。
喺度打工打咗38年嘅經理周滿堂亦話，酒樓風光時曾有百幾個夥計，家雖然得番幾十人，但夥計茶客都好好感情，好似大家庭咁。今次酒家光榮結業，老闆劉玉靈亦跟足勞工條例補償佢哋。