人稱Apple姐嘅78歲無綫資深演員夏萍，今年10月24號上晝喺淘大花園屋企唔小心跌倒(新聞連結： http://bit.ly/1HsTtXz )，留院約17日，今日下午12點35分終於出院喇！

坐喺輪椅上嘅Apple姐，全程由醫護人員照顧護送，身穿桃花色外套嘅Apple姐有戴帽及頸巾保暖，好精神，中氣十足，梁健平為Apple姐拎住折疊式助行架，而另一女友人亦陪伴住Apple姐。之前Apple姐嘅囡囡同孫仔有嚟探望，但今日未見同行，梁健平表示之前聯絡了Apple姐女婿，佢話Apple姐個女扭到腳，所以未能來接母親出院。

在場記者向Apple姐表示係《蘋果》記者，Apple姐即講笑：「《蘋果》？我咪蘋果囉！」準備回家了？Apple姐稱：「梗係啦！唔係仲去行街咩？」Apple姐未有透露是否獨居，不過全程對住鏡頭都笑笑口兼揮手，跟醫護人員專用嘅升降機落去。

其後，Apple姐坐上非緊急救護車，喺車上不時向鏡頭揮手笑晒，又同梁健平有講有笑，又識搞gag講笑，絕對係精靈嘅健康老人。

梁健平送咗Apple姐返屋企之後，接受《蘋果》電話訪問，問佢會唔會幫Apple姐整個平安鐘，梁健平話：「幾年前已經裝咗，不過老人家唔肯掛喺頸。頭先送佢返屋企，已經即刻幫佢掛番。」又透露由於Apple姐係獨居，已安排看護人員由聽日開始送飯畀，同時會幫佢按時打針。

至於Apple姐契仔林家棟，早前稱契媽腰椎有事，梁健平就表示已經好番，只係因為Apple姐有糖尿病同血壓高，所以要控制血糖，食得清淡啲。

講到黃秋生日前話想成立娛樂圈社工隊，一日一電話及探訪，幫助一班圈中前輩，梁健平稱：「有當然好，因為圈中好多前輩。」