潘頓及柏寶剛周日（9日）輪流「騷料」，前者贏「鞍歌」，出閘後騎小步都可能輸，後者騎「將才」更力抗左右夾攻，好起來可以有幾好，大家都有眼睇！

尾場莫雷拉與潘頓，再為我們上演一幕狂放作結尾，真的好戲連場！見習生鬥放，一定會被照肺，可是兩大師傅如此，卻問都唔問，一對熱門馬，加埋投注額幾多？就此輸得不明不白。

今周三（12日）跑馬地賽事，騎師留放分寸、走位更加重要，贏、輸在一念，期望他們上身，倒不如望他們，千萬不要靈魂出竅。

沈集成於周三晚跑馬地煞料夜賽，無巫顯東可用，「知道勝」及「幸運年年」改用蔣嘉琦及黃皓楠，「理想回報」與早決定打叠跑的「最驫」，則用潘頓。

論牌面，當然以用潘頓兩駒較好，沈集成周三有無「理想回報」，得靠潘頓。

早前一直對「理想回報」無好感，存在不少北半球自購馬，來港後受不同外在因素影響，呈現緊張、重口的表現，朝早試跑近乎失控，連莫雷拉都騎到起火，可見有幾差！

沈集成上仗為牠加戴頭罩，效果竟超乎意料般理想，起步後可完全放鬆，一點口勁都無，縱然遇上偏快步速，也覺非主因，末段若非前無去路，肯定更有威脅。

這兩仗谷草千二，前置、留後跑法都試過，加頭罩可令其放鬆留力，今次落在潘頓手上，只要有心機跑，入三甲甚至贏都有可能。