日本組合AKB48每年舉行嘅AKB集團人氣總選,早前宣佈咗喺6月6日於福岡舉行開票活動,今年都係由成員自己報名參加,照以往慣例,大部份成員都會參加,尤其係啲人氣成員。不過,今日屬於SKE兼任乃木坂46嘅松井玲奈,突然喺Twitter上面宣佈唔會參加今年人氣總選,令粉絲十分意外。
松井玲奈喺SKE同松井珠理奈係兩大最具人氣成員,每年人氣總選都有好成績,去年玲奈仲打上咗第5位,今次突然唔參選,令外間好多猜測,有啲粉絲認為佢可能宣佈畢業離隊,有啲就話SKE可能想集中票源係松井珠理奈身上,令珠理奈可以衝擊冠軍。而玲奈就表示上年已經唔想參選,佢話比起排名,覺得腳踏實地努力做嘢更加重要。