遇上一位出版商人Ｃ，睇吓名片，公司名字好熟，好熟。諗咗一輪，就知道好似係傳媒名宿，現樹仁大學新聞系系主任梁天偉嘅老朋友范止安嘅公司。梁總係「壹仔」總編輯嗰陣，經常與范止安，卜少夫兩位前輩在渣甸坊老正興有飯局，有幾次益埋左丁山，故此自己亦認識呢兩位老人家，對佢哋嘅驚人酒量留下深刻印象。范卜兩老已歸道山，范先生經營書局、出版社，莫非出版Ｃ就係佢之傳人？以此詢問，出版Ｃ話：「我已接棒二十幾年，范先生正是家父。」哦，原來如此，世界真細小。想話畀梁總聽，後得知佢已經參加黃軒利大狀領隊之法國美食團，成班老友去咗巴黎嘆世界一番，咁就留番第日至講。
問出版Ｃ：「你哋公司有出版教科書㗎，生意好唔好？」出版Ｃ話：「王小二過年啦。我哋曾出版ALevel經濟學教科書，林本利教授執筆，本來好好賣，算係我哋嘅產品之星，但高考有二萬人選讀經濟學，我哋本書賣幾多本？唔夠二千呀，但已係市場佔有率冠軍！現在網上流行上載下載，筆記周圍飛，加埋二手書搶爛市，你話點做好？我就決定慳番印刷費，唔再出呢本『暢銷書』！」
咁又係頭痛嘅，市場咁細，何來賺頭？出版Ｃ話佢班行家一致認為香港嘅教科書，綜合水平極高，國際上有聲譽，勝於鄰近地區，譬如新加坡教科書有政府包攬晒，大陸亦然，台灣教科書有價格管制，每本二百台幣，將貨就價情況甚為普遍，故此台灣與內地嘅書局，充斥每科補充教材、補充練習，賣到成行成市，而呢類書就係冇價格管制嘅，於是有錢學生就可以買多幾套回家惡補，清貧子弟未免吃虧不少。