德國廣播公司聯盟ARD，準備喺2018俄羅斯世界盃搵新講波評述，代替已經離開嘅前德國國腳史高爾。根據《圖片報》透露，佢哋已經鎖定咗一位人選，就係現時喺美職聯球會芝加哥火燄效力緊嘅「小豬」舒韋恩史迪加。

雖然小豬同火燄2017約滿後，仍然有可能自動續約一年，但世盃期間，ARD考慮到佢絕對抽到時間可以回國講波，所以好樂觀佢會加入講波佬嘅團隊，而上季季尾退役嘅拿姆，據聞就係第二目標，但如果小豬唔應承，先會搵呢位小豬前隊友。

ARD喺今年洲際國家盃期間，已經請咗出櫃嘅希斯貝加、古蘭爾同艾芬堡講波，但後者只係以嘉賓身份亮相，而且未知18世盃會唔會再上嚟，但如果相比下，小豬當然會人氣勁啲。