黃金五兄弟嚟到《今日ENT》，下周一就係中秋節，佢哋都應吓景，同大家一齊玩吓猜燈謎！

甫開始當然就搵啲普通階嘅燈謎俾佢哋試下先：
問：阿拉丁有幾多個哥哥？
鄭伊健：「甲乙丙丁，即係三個。」

問：請問烏龜的心長得像什麼？
陳小春：「歸心似箭，係箭。」

問題：兩個男人坐一舊石？（猜一成語）
陳小春：「一石二鳥。」

見到伊健同小春以秒速講出答案，其餘三人都甘拜下風，錢嘉樂就話：「火爆睇字都唔識，都可以答得咁快。」

講到今次戲中各人嘅名，錢嘉樂指原來係食飯時各人諗出嚟，因為咁先可以令大家叫起出嚟有共鳴而投入。錢嘉樂指伊健當時為部戲留長頭髮，加上又係我哋Leader，所以就叫「獅王」。「火山」就人如其名，小春由以前活火山變成睡火山，依家脾氣好咗，唔會成日爆。

伊健介紹錢嘉樂叫「淡定」，伊健話：「佢面對呢套電影都好大壓力，但覺得佢真係好淡定，處理每件事，遇到嘅困難都好淡定。」林曉峰自我介紹叫「老鼠」，因為電腦一定要Mouse，佢哋個個好似電腦主機，我就做Mouse輔助。到準備介紹天華時，錢嘉樂就急急爆響口話「至於豬Bill。」天華就解釋係因為次次都係佢負責埋單「Check the bill」，旁邊兄弟又取笑話「現實佢冇埋過單。」

今次部戲同以往最大不同地方係錢嘉樂身兼導演一職，問到喺片場度感覺有冇不同？小春話：「好唔同，佢喺現場慢條斯理 step by step去運作成套戲指導我哋，到我哋有啲動作唔得，佢會好淡定慢慢教，同平時好唔同。」天華指錢嘉樂會講得好慢好清楚。

錢嘉樂認為壓力下拍戲氣氛會唔好，所以想大家拍一部好開心但又有質素作品，將來回憶就會美好。伊健指以往拍香港電影速度要好快好趕，好多時會出現脾氣會鬧人，佢話：「拍完嘉樂呢部戲，佢係冇鬧過人，我哋面對係好多困難，好多阻滯，但見佢又冇發脾氣。」錢嘉樂感激一班兄弟陪伴，因為導演一角其實好孤獨，佢話：「呢度係一班兄弟，有時冇佢哋戲份，佢哋都會喺我旁邊支持我，其實好多困難有時未必解決到，但係為部戲，呢部戲唔係只得我一個，佢哋話以前係拍參與嘅電影，依家係拍我哋嘅電影。」

林曉峰表示以前拍拍吓戲會想去玩，但今次會想多啲研究去參與撐自己兄弟，就算唔係自己拍，都會喺現場，佢話：「其實拍攝地方同我哋休息或者住地方好近，好似黑山咁，見到對面岸拍緊，就不如行過去睇，我覺得就係戲外你哋睇到嘅嘢，喺戲內蘊釀大家兄弟情。」天華認為五個人一切去為一件事努力係非常正嘅事。

從之前紅館演唱會就開始為《黃金兄弟》去傾，之後幾年錢嘉樂籌備時間中，一班兄弟都有各出意見去傾談，錢嘉樂表示持開放態度去接納大家意見，雖然最終都會由自己作決定。另外以往五人甚少機會聚會，最多可能由伊健作主動提出，但今次有咗部戲，錢嘉樂就多咗個藉口約埋大家食飯傾電影、傾新歌。

分享完兄弟情後，佢哋再挑戰晉級版嘅燈謎：
問：兩隻手高矮肥瘦乜都有，估一套電劇名？
伊健：「十兄弟。」

問：值錢唔值錢，全在呢兩點？（猜一個字）
林曉峰：「金。」

問：迪士尼獅子王卡通的獅子立巴姓什麼？
錢嘉樂：「姓王，獅子王。」

問：咩房唔住得？
五兄弟夾埋一齊講「票房。」

最後佢哋再唱出主題曲《一起衝 一起闖》而結束直播。

精選娛聞，喺晒《娛果》
http://fb.com/appledailyent

鄭伊健、林曉峰、錢嘉樂：
Hair : John Chung @Barbieri Privata
Make up : Will Wong @ WiLL makeup
陳小春、謝天華：
Hair: EchoWan@Headquarters
Make Up: Eleena Yu
場地提供：帝都酒店