今年就係建制最大黨民建聯嘅25年黨慶，今晚（23號）佢哋就喺紅館搞黨慶匯演，呢個氣派莫講話冇阿爺條水喉射住嘅民主派及唔上，好多建制派政團都使唔起咁嘅錢。

既然訂得紅館場就梗係要表演，之前八方都提過，除咗有成班民記議員大合唱《同舟之情》外，人稱民記「四老」嘅前立法會主席曾鈺成、前議員譚耀宗、陳鑑林同葉國謙就負責棟篤笑。

睇番現場片段，四老一嚟就扮演準備坐高鐵返大陸旅行嘅四位小生，然後少不免大讚高鐵一地兩檢有幾好、有幾快，葉國謙就大讚坐高鐵唔使好似坐飛機咁，要早幾個鐘到機場，又唔使驚空管之類喇。

然後話鋒一轉，就變成力數民主派反對一地兩檢，譚耀宗話民主派最鍾意講啲嚇人嘅說話，曾鈺成就接力搬埋民主黨林子健單嘢嚟講。曾鈺成話有個肥仔聲稱自己喺光天化日被人捉咗去打到成腳都係釘，葉國謙跟住話其實肥仔唔係被公安拉，而係被香港警察拘捕，最後由陳鑑林埋尾話坐高鐵最好買個魚柳包食，咁就被人釘都唔怕。之後，劇情就變成四老坐住高鐵遊大灣區，由廣州電視塔、惠州西湖、肇慶大鼎，去到佛山、江門都有，真係大灣區一日遊。

話時話，尋晚民記嘅黨慶匯演係齋做，冇為個黨籌款嘅。而舊年民記搞籌款時，前中聯辦主任張曉明送4粒字「度德而處」，就幫民記籌咗1,880萬元，唔知接棒做中聯辦主任嘅王志民使唔使練定啲字，遲吓又幫民記籌款兼打破小明嘅紀錄呢？