24歲無綫小花歐陽巧瑩（Tammy），早排響應Free The Nipple運動，喺美國真空大解放，就係咁成為新聞人物……香港人有時都好關心社會運動0架，就好似呢個「世界無胸罩日」咁…

「真空咪神」Tammy同幫佢影嗰張「解放乳頭」相嘅「木偶哥」林師傑，拍拖兩年幾，同居西貢濠涌，有時一齊拍拖拖去圓方食壽司，有時就去咗ifc行街又去超市買零食，情人節就去合成糖水撐枱腳，生活相當平民化。

好似噚晚(13號)9點幾，忙緊拍《特技人》嘅林師傑終於有時間陪Tammy，同行仲有一男性友人，去將軍澳東港城間「冬蔭公公」晚膳，Tammy同木偶哥著晒情侶裝，痴得好埋一齊睇吓食乜嘢，跟住三人有講有笑，一樣都好平民化。

早幾日Tammy先至喺IG貼圖，慶祝同林師傑拍拖1000日紀念，唔知佢哋會點慶祝呢？

林師傑同女友接受傳媒訪問，原來佢哋本來諗住收工撐枱腳，咁啱撞到周志康，於是咪一齊食飯，問同男友係咪日日咁恩愛？Tammy話：「都咁耐啦，得閒咪去食個快飯，o依家又反緊tvb開劇喇。」唔知有冇結婚計劃？佢就話：「同之前答嘅一樣冇變，過多幾年先再諗，俾心機搵錢先，趁後生。」林師傑亦口徑一致話：「搏殺多幾年先啦。」