正當大家忙於送虎迎兔之際，地產界率先傳嚟喜訊！路邊社消息透露，地產大好友、信和置業（083）老闆黃志祥嫁女，而黃老闆為咗同班員工分享佢嘅喜悅，就每個員工派兩嚿水利是。無錯，係兩嚿水，取其喜事成雙之意！兩嚿水好意頭嘛，所以信和員工千祈唔好同恒地（012）嗰邊比呀！
今次都唔係Robert（黃志祥洋名）第一次向員工派利是，聽講前年佢抱孫，都係每個員工派兩嚿水利是。
探子老友話，Robert個女敏華，係上個禮拜出閣嘅，聽聞註冊儀式喺家鄉獅城舉行，稍後會唔會喺香港大宴親朋就唔知，之不過，黃氏家族喺香港有咁多物業，就算要大搞特搞，都一定唔怕無場啦！係呢，新郎哥係邊位呢？側聞係XX綠茶個太子爺，不過，到家都無人肯證實。