武夫升呢彈琴冧舒淇
甄子丹寸偉仔唔打唔使傷
【上海直擊】以打聞名的甄子丹近日一改戲路以鬍鬚look扮演陳真,夥拍性感女神舒淇演出新戲。昨日兩人在上海以懷舊造型拍攝,但咀戲床戲欠奉,問到會否效法梁朝偉以電眼做戲,甄子丹明寸對方指放電並不一定要眼眨眨,至於偉仔拍葉問經常受傷,甄子丹更毫不客氣說:「唔打咪唔傷囉。」
寰亞新戲《精武風雲》昨日在上海以200萬人民幣搭建一座夜總會拍攝,舒淇造型密實,甄子丹則以二撇雞鬍鬚look出現,同場還有黃秋生及內地女星霍思燕,導演劉偉強及老闆林建岳也在場監督。甄子丹在戲中扮演陳真,除了以西裝鬍鬚look出現外,他還要彈鋼琴冧舒淇,但身手了得的甄子丹又怎能少了武打場面,至於和舒淇有否親熱戲?甄子丹笑言一概欠奉。
提到今次轉形象以斯文靚仔在戲中出現,甄子丹開始明寸同樣演葉問一角的梁朝偉,他說:「人哋打詠春,我整二撇雞。」會否效法偉仔以雙眼放電做戲?甄子丹笑說:「唔知乜嘢係放電,我唔識,但魅力都有啲,我會好用心望太太,其實有好多方法電人,唔一定要眼眨眨。」提到偉仔拍葉問時經常受傷,甄子丹笑言有時間一定會指導他兩招,可惜因拍攝場地不同,故未能探班,有機會會否教偉仔兩招避免自己受傷?甄子丹毫不客氣說:「唔打咪唔傷囉,我自己都成日傷o架。」
雖然不用拍咀戲床戲,但舒淇卻要在戲中演出3至4場的跳舞戲,她透露花了數天時間,每次排足幾個鐘,相當辛苦,導演還要舒淇獻唱類似《卡門》歌曲,她苦着臉說:「唱呢啲歌要有深厚功力,我呢方面真係冇信心,希望可以有代唱。」
甄子丹以二撇雞造型彈琴冧舒淇,造型與以往的打仔完全不同。
偉仔扮演葉問拍打戲經常受傷,還要遭甄子丹寸,認真慘情。 資料圖片
由於上海天氣寒冷,故舒淇不慎病倒,她透露甄子丹更曾病倒入院吊鹽水。問到如此辛苦何不索性嫁人收山?舒淇說:「唔一定坐喺屋企睇DVD,或者喺餐廳飲紅酒先開心,有時成班人拍戲拍出成果都好滿足。」聖誕節雖無男友陪伴,但舒淇表示和朋友唱K一樣可以相當開心。
採訪、攝影:曾小嘉
霍思燕穿上旗袍味道十足,今次能跟多位好戲之人合作,機會難得。