開學前夕趁住周末，李亞鵬一身黑衫打扮，帶住穿連身紅裙，戴住眼鏡嘅12歲女兒李嫣去睇展覽。展覽係用眼睇，不過李亞鵬全程用電話幫阿女影相，紀錄住囡囡嘅一舉一動，仲去買紀念品添，父愛洋溢。

原來佢哋去咗北京嘅798藝術園區入面嘅「悅•美術館」睇一個名為「新壺中天•桃源篇 — 首場東方文化沉浸式藝術展」，入場票價仲有親子票約218元人民幣，至於呢個展覽，被形容係前所未有嘅藝術體驗展，入場仲有一粒白桃糖果送畀你食。

李亞鵬接受大陸傳媒訪問時都有解釋，謂逢周末有時間，都會儘量帶個女去睇下各種展覽、演出，但一切都係尊重女兒個人意願行先：「家長盡可能不要按照自己意願幫孩子選擇方向。如果她發自內心有興趣的話，我再幫她創造一些機會。作為孩子來講，她也並不知道自己現在真的喜歡什麼，我覺得多帶她去接觸一些門類學科很重要。」

其實李亞鵬自2013年同王菲離婚後，一直獨力撫養女兒李嫣，去到邊都帶住個女喺身邊，成個廿四孝老竇咁。之不過凡事都有因，佢上個月接受魯豫訪問，講到佢創業之路並非容易，試過連續6年都冇收入，亦因為咁冇錢養家。佢仲話離婚後好愧疚，遺憾未能給女兒一個完整嘅家，直認係無法迴避嘅失敗，花咗半年時間先接受到離婚嘅事實。

精選娛聞，喺晒《娛果》
http://fb.com/appledailyent