08HondaStepwgnSpada2.4
MPV谷個性 跑得起
話部七人車跑得起、有跑格,大家實話:「講笑咩?」坦白講,大家唔會期望一部七人MPV真係同部跑車一樣咁跑得啩?既然要得部七人車,絕對係以實際需要作考慮因素,要載得人多兼可以載吓物咁,至於外觀同性能反而係其次,若然部車外觀富流線型,性能又唔錯跑得兩下就絕對係Bonus,而08年式StepwgnSpada仲多埋個性化嘅型仔Outlook,絕對係一部跑得起嘅七人車。
記者:梁美甜
攝影:王文忠
模特兒:Enrica
StepwgnSpada係齋版Stepwgn嘅性格版本,代理致力為Spada版塑造出個性化外觀,由車頭鬼面罩到車尾泵把設計都以型格為前提。代理仲事前張揚,車展期間都會以特惠價發售,但就講到明全線車系會喺車展後調整車價!08HondaStepwgnSpada係小改款,同上一款外觀上其實變動唔多,鬼面罩換上銀色金屬飾板、HID頭燈,同埋16吋五輻式鋁圈,引擎更係環保i-VTEC兼配備CVT無段變速及七速加減撥片,最大馬力可達162匹及22.2kgm扭力,力水夠、轉波及操控又容易,喺享受駕駛樂趣方面同時兼顧得到。叫得七人車,內櫳空間毋庸置疑之外,靈活嘅摺合變動更有助唔同嘅需要。無論你要照顧一家大小,抑或要型要冧人,一樣啱!
某日,喺車展聽到兩母女抬槓:
母:呢部七人車坐得多人好!
女:又唔係揸小巴,坐咁多人做咩?
母:成家六個人咁多,部車仲幾型仔,有線條得嚟又不失肌肉感,內櫳又皮椅、又天窗,座位又闊落。車大又有ParkingCamera,泊車幾水皮都無有怕,最盞鬼係啲座位點郁都得,Shopping都有位擺!
女:又係喎!部車望落都唔係太薯仔,仲有少少跑Feel㖭。
b.駕駛席空間夠大,男女都無問題,反而係波棍喺中控台旁有啲唔慣。
c.有ParkingCamera,後鏡仲附有數碼模擬俯瞰功能。
某日,喺Cafe兩個年輕有為Style男士HighTea吹水:
甲:你都同我一樣買咗呢部MPV?
乙:女友話同佢嘅狗狗Baby出街,唔方便又唔夠空間畀佢走喎!
甲:HondaStepwgn空間夠大,隻狗點走都得!唔只咁,老細見我部車載得人多,叫我接埋個客兼食飯。
乙:部車身線條簡單得嚟又不失大方,內櫳坐得舒服,唔會失禮啲客㗎。
甲:最估唔到係部車原來係七速加減波,揸起嚟幾爽,162匹馬力夠晒,星期六約埋幾個Friend一次過載晒去打Golf囉!
d.錶板角度調校得宜,起碼揸緊車唔使側晒身至睇到囉!
e.車頭小改,個人覺得霧燈最型仔,三橫間設計夠獨特。
f.雖然16吋胎軨都唔叫細,之不過部車有番咁上下大,襯17、18吋就型啲喇。
g.390mm超低地台,至方便老人家及小朋友上落。
某日,喺某個商場見年輕夫婦閒聊:
男:𠵱家阿爸阿媽同外父外母都唔怕同我哋一齊去街喇!
女:之前佢哋怕部車逼,又怕上落車麻煩又辛苦。
男:呢部StepwgnSpada有390mm低地台,細細步都檻到上車,遙控、手控又或者司機位都開到門,上落兼顧晒喇!
女:仲有三個大天窗夠開揚㖭。
h.中控台設計簡單,連USB連接裝置都有埋,幾時都可以播心水歌。
引擎:2,354c.c./直四i-VTECDOHC
馬力:162ps/5,700rpm
扭力:22.2kg-m/4,000rpm
傳動:CVT無段變速連七速加減撥片
查詢:合群汽車(23802231)
日期:2008年3月15及16日(今、明)
時間:10am-9pm
地點:尖沙嘴海運大廈展覽大堂
查詢:28278622