開台3年嘅ViuTV今年將會有新搞作，由呢個月29日開始，黃金時段節目將重新安排，周一至周五晚上9點30分至10點30分，每晚播放1粒鐘自家製劇集，打頭炮會有由鄧萃雯同陳錦鴻主演嘅《婚內情》，及鄭少秋同陶大宇主演嘅《詭探前傳》，全面夾擊無綫惠英紅主演嘅《鐵探》！

鄭少秋、陶大宇、鄧萃雯、杜汶澤同陳錦鴻等，噚日喺九展出席節目巡禮，秋官喺台上被問與以往合作嘅電視台感覺有乜唔同？佢話：「ViuTV安排得好好，有足夠嘅休息時間，悉心嘅製作。」

主演《詭探前傳》嘅秋官、陶大宇同江若琳齊齊接受訪問，問到拍攝時有冇遇到靈異事件？秋官搞笑話︰「有人證實我一作法，嚿烏雲就會飄過嚟，就算大宇唔喺度，都會落大雨。」大宇接口話︰「有日拍神壇戲，本來係黃雨、黑雨，點知一裝香就停雨。」

阿澤唔敢闖北京

講到會同惠英紅、姜皓文主演嘅大台劇《鐵探》硬撼，秋官冇有怕︰「冇信心點會接！」問佢驚唔驚「丁蟹效應」，出劇又跌巿？佢話︰「一早破咗，大家快啲補倉㖭。」

另外，今次杜汶澤再拍《走佬去馬拉》，佢話：「因為當年我被封殺，14年去咗馬拉開公司，走佬梗係熟路，所以今次去咗馬拉。」主持笑稱：「通常衰咗先走佬喎，啲人咪好鍾意睇你衰囉！」阿澤即笑說：「睇人X街係最開心，𠵱家係咪直播緊㗎？」事後阿澤表示年底會再拍新一輯，希望去一個香港人可以負擔嘅地方，有人提議去北京，佢話：「北京？咁就真係未出發先興奮，我張回鄉卡仲喺唔喺度呢？不過無謂試喇！」
撰文：馮仁昭