台灣為刺激消費救經濟，大派消費券鼓勵民眾使錢；澳門最近亦大開庫房派錢，只要係「馬交」永久居民就有5000元，總之救市大過天！
相形之下，香港失業率急升殺到埋身，裁員新聞無日無之，但港府連十大基建都仲係拖住，辦事效率真係慢過人。
如此經濟環境，每日都有不同負面消息出現，港股短線真係好難炒上。雖然香港背靠祖國，經濟點都會受惠內地經濟持續增長；不過，若論股市，因港股已漸由中資股支配，內地股市稍見震盪，港股亦難免遭殃，昨日大市急跌，失守萬三關，就係受深滬股市急挫影響。
經濟轉差，通脹壓力隨之下降；內地商務部最近預報，全國主要大城市豬肉平均批發價續跌，與今年春節期間最高價時相比已回落逾兩成，豬肉價格續跌，某程度有利從事肉製品加工供應的雨潤食品（1068），該股昨日逆市微升0.02元，收9.64元，反映該股在近期跌市中具一定防守力。

雨潤上月一度跌至6.30元低位，其後跟隨大市反彈，踏入11月以來，於8.45元至10.20元之間上落，可候回吐時吸納短炒，以11.80元為獲利目標，跌穿8.40元止蝕。
方星俠