據知呢個逾百人訪京團約喺10日至12日成行，去北京前會先到深圳、即係國家改革開放第一個試點考察，有消息指全國政協常委唐英年、前政協常委陳永棋、溢達集團楊敏德等亦獲邀，現任港區人大常委譚耀宗同香港專業聯盟主席劉炳章亦榜上有名。據知前特首梁振英會以全國政協副主席身份隨團。
對上一次香港嘅大型訪京團已經數到2014年9月，即係佔中運動爆發前夕，當時帶隊嘅係全國政協副主席、前特首董建華，主要係大孖沙同專業界代表隨團，幾大地產商頭目如長實李嘉誠、恒地李兆基、新世界鄭家純等畀面參加。當時係習大大接見，寄語香港社會各界齊心協力，喺中央政府大力支持同特首及特區政府帶領下，共創香港更加美好未來，時任特首梁振英當時未獲大孖沙支持，習大大似乎係有的放矢。唔知小熊維尼同粉紅豬友Piglet，呢次再並肩又會有乜新猷？