當年今日
關於我們

分別係肥佬黎 - 左丁山

蘋果日報 2005/02/15 00:00


老友自台灣來,順便帶來台灣《壹週刊》,週刊由壹仔喺一九九○年創下先河,分AB兩本,現已成為中文週刊之流行標準。台灣《壹週刊》嘅bookA零舍薄,比較之下,bookB有二百五十六頁,bookA有一百二十八頁,點解差咁遠呢?自然唔係因為bookB內容更多,而係bookB係娛樂名人明星,一般係女士睇嘅,吸引大量廣告,反之bookA以時事、財經為主,男士讀者居多,廣告就少好多。無怪個個做出版嘅都話,唯女子與小孩易養起刊物也(古語唯女子與小人難養也,被視為歧視女性)。婦女雜誌與兒童漫畫生唔到金蛋都可以生雞蛋,男人刊物就瓜多過菜。
與編輯K傾起此事,編輯K話:「又好難怪啲廣告商唔響bookA落廣告,本港嘅週刊都係bookB厚過bookA好多啦。鬼咩,bookA成日講黃賭毒、高級雞竇、淫樂之家,啲老總好似上咗癮(或者佢哋私人上咗癮)咁,以黃色為封面故事,啲高級廣告邊度敢行埋嚟呀,費事搞到自己個牌子cheap晒啦。」
編輯K出身壹仔,俾肥佬黎鬧過(其實係人都俾肥佬鬧過),後來離開咗,在其他週刊浮浮沉沉。左丁山問佢另一個問題:「其實唔少週刊編採人員都自壹仔出身,點知去到其他週刊,硬係啲文筆好似退步咗,寫唔到神韻出嚟嘅?」
編輯K笑一笑:「肥佬黎好乞人憎,成日鬧人,但佢有一度好,就係夠放手,放手畀我哋寫人寫事,絕無禁區,得罪權貴一樣照去,所以我哋寫得好過癮,好有心機。但出咗嚟之後,發覺每度嘅大老闆都有禁區,得罪佢哋嘅朋友唔係俾外人鬧,而係俾佢哋抦,於是下筆時就顧忌多多,耐咗,重邊有心機寫好個古仔,投其所好咪得囉!」原來如此,唔知廣大讀者有冇留意到呢?