香港福建社團聯會日前召開大會，向會員派發推薦嘅區議會選舉候選人名單，除咗有兩名泛民中人上榜，令人好驚奇之外，當中仲包括大量報稱獨立嘅人士，部份仲標明候選人係福建祖籍。

好似競逐連任中西區西環選區嘅民建聯副主席張國鈞咁吖，就被標為「晉江女婿」；油尖旺奧運選區挑戰民主黨涂謹申嘅重慶市政協、報稱獨立嘅高曉榮，亦被括住係晉江人。

八方問阿涂，點睇佢對手獲福建社團力撐？佢笑笑口話自己都係正宗「福建女婿」，外父唔單止係福建人、仲要係聯會成員，唔知福建社團聯會，又會唔會支持呢位「鄉親」呢﹖而中西區西環候選人，仲包括民主黨莊榮輝。