【金鐘】母親節就快到,同樣已為人母嘅前女子組合2R成員黃婉君(Rosanne)同埋名模馬詩慧(Janet),日前分別喺金鐘同中環被拍得同囝囝行街,偷閒享受親子樂。
日前大約下午3時左右,Rosanne同老公及4歲大囝囝Dylan現身金鐘,兩人拖住囝囝逛商場,邊行邊抽起囝囝的手臂扮空中飛人,場面溫馨。Rosanne老公負責孭住兩大袋戰利品,佢自己就全程照顧囝囝,4歲的Dylan非常精靈,而且表情多多,逗得Rosanne開懷甜笑。購物完畢之後,三口子仲去到商場入面嘅戲院買預售戲飛,似乎Rosanne同老公係準備二人世界,之後一行三人再到附近餐廳嘆下午茶,消閒咗大半天。