李八方online|立法會標誌黃色之謎?
李八方online陳智思掃黃立法會
或許好多人都知道立法會嘅標誌係現任行會召集人、前立法會議員陳智思設計嘅,但係點解會揀咗黃色做主色呢?原來當年陳智思明令禁止用紅、藍、綠三隻色。
立法會標誌會由陳智思設計嘅故事,大家Google吓就知,八方唔重複。不過陳智思喺今晚(18日)港台節目《鏗鏘說》入面就提起,98年時任立會主席范徐麗泰叫佢設計立會標誌時提醒佢,個標誌要獲內會一致通過先得,於是佢就諗方法,畀佢諗到建制派、親中人士鍾意咩色?紅色。
然後佢又問《鏗鏘說》主持人前大律師公會主席石永泰,嚮往民主嘅人又鍾意咩色?石永泰就話:藍色、綠色。
就係咁,陳智思當年就同設計師講,紅、藍、綠三隻色都唔用得,反正佢目標好簡單,淨係想內會通過佢揀嘅設計,各派人馬鍾唔鍾意唔係重點,所以佢就喺幾款設計中揀咗而家用黃色嗰個。石永泰得知真相後不禁話「咁有遠見嘅你」,陳智思隨即補飛:「今日黃色可能唔係好適合喇。」
大家當然明白今日黃色代表嘅係咩,而立法會嘅標誌亦無變過,不過今日嘅立法會仲係唔係當日立法會?心照啦。
-----------------------------
-----------------------------