奧斯卡影后愛瑪史東（Emma Stone）喺新片《男女單打戰》（Battle of the Sexes），扮演網球名宿金夫人（Billie Jean King），電影講金夫人同里格斯（Bobby Riggs）喺1973年進行歷史上著名嘅網球性別大戰。愛瑪仲增肥15磅，以演活運動員角色。

愛瑪近日忙於宣傳新片，前日同金夫人出席完紐約首映禮，又上咗美國名咀Stephen Colbert節目《The Late Show》，當晚佢遇到另一嘉賓希拉莉（Hillary Clinton），兩人仲拎住宣傳T恤合照。愛瑪喺節目提到可以同希拉莉合照係令人難以置信同不可思議，不過由於佢當時着住tube dress，件T恤遮住條裙，令愛瑪覺得自己好似冇着衫咁。