李八方online︱港大法律學院院長傅華伶獲任法改委新委員
蘋果日報 2020/12/31 13:55
傅華伶時代雜誌法律學院港大鄭若驊李八方online
特首已委任香港大學法律學院院長傅華伶、香港律師會前會長熊運信及香港中華總商會現任常務會董、新華集團顧問及法律總監蔡關穎琴為法改會新成員。
被美國《時代雜誌》形容為「最糟糕的一年」嘅2020年，嚟到最後一日，新年有咩新希望？法律改革委員會今日（31日）宣佈，特首已委任研究範疇包括人權同公法嘅香港大學法律學院院長傅華伶、香港律師會前會長熊運信同香港中華總商會現任常務會董、新華集團顧問及法律總監蔡關穎琴為法改會新成員，任期3年。
傅華伶同熊運信嘅任期將由明年1月1日開始，蔡關穎琴嘅任期就由明年3月1日開始。新人事會唔會有新作風呢？觀乎法改委職能似乎有啲難度，睇返佢哋手頭上嘅研究，包括性罪行檢討、檔案法、公開資料、電腦網絡罪行等等，其中性罪行檢討由06年開file，之後多次就唔同議題諮詢公眾同發表報告書，但一切都都有待行政機關落實，而查實法改委都喺網頁上戴定頭盔，話無乜可能會研究政府已表明冇改革需要嘅法律範疇。
回一回帶去舊年年中，仲有民主派議員存在嘅立法會，司法及法律事務委員會曾經通過由民主派議員提出嘅無約束力議案，促請法改委全面檢視《公安條例》，確保所訂罪行必須符合人權保障，可惜律政司司長鄭若驊講咗句會考慮點跟進後，就一啲聲氣都冇。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！