當年今日
關於我們

李國章搬屋 - 左丁山

蘋果日報 2003/07/28 00:00


前星期喺沙田馬會飲茶,撞見中大前校長李國章夫婦撐枱腳,李太睇嚟精神幾好,可能係接受治療幾個月之後,佢患上嘅乳癌受到控制啩。李太經常要到威爾斯親王醫院,住響沙田,係比較方便啲。
中大學生會大概要搵啲「議題」(issue)發揮吓,去信畀中大校董會主席、校長等人,要求解釋李國章點解重係住在校長宿舍「漢園」,要向公眾交代。呢件事其實係non-issue,好易答啫:(一)中大資產如果係用公帑興建嘅,即係納稅人資產,應該爭取合理回報。李國章辭職後,金耀基教授做過渡校長一年半,佢唔想由細屋(駿景園)搬去大屋(漢園),再由大屋搬番細屋,合道理到極,咁樣,如果李國章搬走,漢園丟空,對中大,對公眾,有乜好處?答案係冇!
(二)李國章交市值租金,自付水電費,自己請工人,等中大可以利用一間吉屋收租有收入,喺政府削減大學經費之時,直情係一件好事,可以增加中大收益。(三)以上係講道理。講人情,李國章對中大有功有勞,李太不幸患上癌症,唔想搬住,想住近啲威爾斯,中大相就吓,唔叫佢哋快快搬,有乜唔啱?中大精神有情有義,啲學生應該識得。
李國章好識做人,知道中大新校長明年到任,於是十月就搬走,等有時間清理「漢園」(其實已經好舊要裝修)畀新校長入住。中大學生會要追究,有佢哋嘅權利,不過冇乜意思啫。