當年今日
關於我們

【好有心思喎!】江美儀用豹哥名義助養小朋友搞到佢眼濕濕

蘋果日報 2017/03/18 14:47

江美儀單立文

江美儀今日喺大尾篤出席狗狗步行籌備活動,帶同愛犬Teddy及Tina齊齊做善事。江美儀好似湊BB咁抱住兩隻狗狗,佢話:「湊狗好似湊仔咁,我都係買啲BB嘢嚟抱佢哋,起碼條腰骨冇咁傷。」
講到平日湊狗狗,佢話因為Teddy同Tina係細型犬唔需要成日出街,仲自爆對家中嘅外傭姐姐有特別要求:「我嘅條件係唔使放狗,始終唔放心,寧願自己喺屋企嘅時候先同佢哋出街。」佢又話妹妹Tina外表純良,但其實係家中最惡嘅小霸王:「佢成日喺屋企吠,今朝先畀我鬧完咋。」
提到好友單立文(豹哥)生日派對,江美儀自爆同胡杏兒撞衫:「佢指定要豹紋,我連豹紋底褲都冇喇,於是好開心喺網上訂咗件褸,點知一去到,同杏兒撞咗,咁大個女第一次同人撞衫咋。」生日禮物方面,江美儀話:「我送咗一份特別俾佢,我每年都會用豹哥嘅名義助養一個小朋友,佢老婆同我講,豹哥收到封信嗰陣眼濕濕呀!」