「港獨」這個議題，最近鬧得沸沸揚揚。十間大學校長聯署譴責學生會民主牆有標語濫用言論自由，中大校長沈祖堯亦宣佈，校董會執委會開會後決定，要求學生會盡快移除民主牆上討論港獨的標語。他解釋，港獨違反基本法，大學的立場絕對反對港獨。

究竟今次「港獨」是文革式批鬥還是打稻草人？前特首曾蔭權一番話，在這個時候或有醍醐灌頂之效。去年他接受傳媒訪問時，提到港獨思潮，僅說：「有啲嘢係真嘅呢，你點消滅都消滅唔到嘅；有啲嘢係假嘅、係虛浮嘅呢，你唔使做咩佢都會自動消滅。」是那些人常常把「港獨」掛在嘴邊？不言而喻。

講番曾蔭權，佢因為公職人員失當罪成，判囚20個月，服刑兩個月後，於四月底獲准保釋等候上訴，案件排在本月26日開審。暫時回復自由身嘅曾蔭權，數度被拍得一人同一個保鑣漫遊中環，滿頭白髮，揹住嗰背囊，雙手插袋一派悠閒。

今日傍晚六點幾左右，身穿西裝、配上藍白色袋巾，孭住個背囊，同胞弟、前香港警務處處長曾蔭培一齊現身中環皇后大道中，急步而行，兩人白髮都不相伯仲。保鑣則負責殿後。只見曾蔭權單邊孭住背囊，神情輕鬆，快步疾走，一邊同戴住口罩嘅曾蔭培講嘢。兩人混在中環一眾白領中儼如有保護色，竟然一直未有市民發現前特首與前警隊一哥就在身邊。

似乎好趕時間嘅曾蔭權，一直走在前面，與曾蔭培走入豐盛創建大廈，曾蔭權又係一個箭步行先上扶手電梯，上一樓大堂轉乘升降機。曾蔭權先入，保鑣已發現記者，保安即表現得非常緊張，本來神情輕鬆的曾蔭權亦變得凝重，左手插袋，不自覺地垂頭避鏡頭，眉頭緊皺；而曾蔭培即拎部手機篤篤篤，背向鏡頭與曾蔭權耳語。兩人登樓後，大廈保安亦特別再落番地下巡視一周，確保記者已離開。

相關文章：
【首談獄中生活】曾蔭權稱囚赤柱情緒波動大 睇唔番自己啲字
http://bit.ly/2y3DA6h

【獨家】72歲白髮曾蔭權雙手插袋漫步中環 一個保鑣隨行
http://bit.ly/2x2sG44

【典型香港仔】任特首曾揚言「民望如浮雲」 曾蔭權判囚卻稱「我一生都係信香港人」
http://bit.ly/2x23k6e

曾蔭權談港獨：真嘅消滅唔到 假嘅會自動消滅
http://bit.ly/2jt6QAY