年初因為喺拜年短片中講廣東話、寫毛筆字而受注目嘅英國駐港總領事吳若蘭，最近被揭係大花筒。英國《每日郵報》網上版Mail Online踢爆吳若蘭生活奢華，用英國公帑租住亞洲最貴分層豪宅，以螺旋形設計、有「扭紋大廈」之稱嘅傲璇（OPUS HONG KONG），月租據知逾6萬鎊（約72萬港元），英國國民知道後O嘴兼叫停。OPUS被喻為亞洲新樓王，呎價試過高達6.8萬，仲創亞洲分層單位新高㖭。

月租估計逾72萬港元

Mail Online噚日披露，去年10月來港出任英國駐港總領事嘅吳若蘭，同佢領事館嘅一班同事，租住東半山司徒拔道傲璇三樓全層，一共4,600呎，內有四間豪華睡房，全屋都係落地玻璃，坐擁無敵靚景。
報道話呢間豪宅屋租據悉高達6萬鎊（約72萬港元），同時又話前任領事奚安竹在位時，則喺山頂加列山道租屋住，月租30萬港元；比較起上嚟，吳若蘭花費豪咁多，點會唔惹起民憤？
原來吳若蘭上周仲喺呢層豪宅，招待來港嘅英國欖球隊British & Irish Lions嘅隊員，齊齊喺露台舉杯暢飲，認真識嘆。英國網民狠批佢大花筒，話英國面臨財困，政府大幅削減公共開支，死慳爛慳，點知呢位外交官就喺香港揮霍無度，令人憤怒，要求佢即時停止租用。
領事館拒絕向Mail Online透露確實月租金額，但就死撐話，寓所係用嚟定期舉行外交活動，包括招待數以百計嘅來賓，一句講晒：No problem，差在未叫大家Keep calm and carry on！

mailto:[email protected]
李八方

【蘋果動新聞】Android App 修正版上架

回應讀者要求，Android App修正版改善記憶體使用情況，以及廣告顯示模式，即刻去Play Store下載啦！↓↓
http://bit.ly/appledailyupdate