當年今日
關於我們

【四嚿腹肌冇得欣賞】煮減肥版賽螃蟹 劉浩龍都出得食譜

蘋果日報 2018/03/09 17:23

劉浩龍食譜賽螃蟹減肥版

劉浩龍(師兄)今日喺商台宣傳下月27日嘅演唱會,原本178磅嘅佢透露花咗個多月,每日跑8公里,亦有跟教練操,現時瘦咗22磅,不過佢話教練想佢總共減30磅。係咪食得好清?師兄話:「只准食菜、雞胸、海鮮同蛋白,我呢排研究點樣將呢幾樣嘢整到最好食又唔悶,前一晚我諗到整減肥版嘅賽螃蟹,所以食得開心,如果有效果,其實我可以出書。」
練咗4嚿腹肌嘅師兄,師兄直言未必會喺個唱中除衫,更透露今次會嘗試跳舞,佢話:「一直都係跳舞蠢材,以前我打功夫,所以我跳舞就好似打功夫,笑我都好,都係娛樂觀眾啫!」會唔會搵女友容祖兒教跳舞?師兄表示:「我已經搵到一個排舞老師,因為佢知道我咩跳到,而唔係迫我做一啲我完全做唔到嘅嘢,例如柔軟嗰啲我唔得。」祖兒會唔會去睇?師兄話:「我相信每個朋友都會嚟啩,我咁耐冇開,今次都擔心,因為喺麥花臣開,唔係好多位。」
此外,對於祖兒早前旅行一個月,可以延續自己獨遊樂趣,講到佢冇同師兄慶祝情人節,祖兒表示唔會講呢啲嘢,即時傳出感情有變消息,師兄話:「佢同媽咪去旅行,我喺新年有好多工作,我覺得自己去旅行唔係好大件事,1月我自己都有去旅行,不過同老闆去滑雪,其實都係好平常嘅生活,每個人都有自己嘅生活,只不過可能佢以前好忙,未擁有自己嘅生活,呢排有時間去享受番,我覺得好正常。」
精選娛聞,喺晒《娛果》
http://fb.com/appledailyent
empty
師兄為咗演唱會減咗22磅,仲研究到將菜、雞胸、海鮮同蛋白煮到好好食。