公關Ｐ即將嫁女，消除父親的焦慮，唔使驚女兒嫁唔出。公關Ｐ強烈否認有「父親的焦慮」，因為Ｐ千金聰明絕頂，哈佛大學榮譽畢業生，劍橋研究生，點會驚噃。左丁山就認為個女愈叻，父親就愈驚，驚女兒眼角太高也。
設計Ｙ就話唔明白啲父母驚乜鬼，佢眨吓眼離開中五班已經十年，成為紐約嘅燈光設計師，鍾意在紐約生活。據佢話，全班中學同學，還沒有一個結婚；班中學老友，個個住在屋企，唔使交租，家庭出外食飯，奉旨係老竇付鈔，阿媽重會間中買一兩件新衫畀阿女，仔女份人工就自己運用可也。

設計Ｙ講：「父母嗰代人最辛苦，既要撫養仔女，又要照顧阿爺阿嫲，佢哋結婚嗰陣，全無事業基礎，銀行儲蓄戶口最多只有四位數字嘅存款。哈，佢哋又夠膽結婚生育噃，我哋呢一輩有邊個會有咁大勇氣？即使爸媽畀錢做買樓首期，我哋都唔想孭層樓孭足十幾二十年！」
設計Ｙ都還好，肯做肯捱，出外獨立生活，在世界鱷魚潭紐約找生活，唔喺屋企打機，到咗二十六歲重伸大手板。日本有一個名詞叫「Neet」，即係「Notinemployment,educationortraining」（不打工、不讀書、不培訓）或可譯為「三不一代」，日本政府統計日本全國有五十萬Neeters，年紀在三十歲以下，呢班人不肯工作，唔讀書，覺得輕鬆安樂，因為大多數都由父母養住。有咁多Neeter，而日本人口不斷老化，到咗2025年，日本每兩個僱員就要養一個拿長俸（六十五歲以上）老人，你話到時點搞。
除咗Neeters，重有Freeters（不愛終生打長工，只搵散工，不斷跳槽之人），兩類人只要放鬆、不要辛苦、去涉谷（Shibuya）威威。最近啲Neeters重由社工帶領，在涉谷遊行，宣揚佢哋嘅生活模式。呢股日本風，會唔會吹來香港？