隨住民建聯葉國謙喺九月換屆選舉、唔再喺傳統區議會界別爭取連任，換言之佢哋個黨都要搵人接棒出戰。面對黨內年輕區議員都對此議席虎視眈眈，若然仲玩欽點，未必擺平不滿，所以佢哋今屆破天荒就此議席搞黨內遴選，由該黨區議員票投心目中理想人選。

最終有四個區議員包括陳學鋒、劉國勳、洪錦鉉、鄭泳舜入閘爭凳仔，早前仲有內部簡介會，畀四位參選人講述參選理念。投票噚日結束、今日點票，八方聽聞，北區區議員劉國勳得票最多，力壓獲葉國謙推薦嘅陳學鋒。

係咪咁就等於，劉國勳一定可以出戰？又唔係喎，皆因至少仲要先等中委會喺29號會議確認選舉結果。八方問過劉國勳，佢話等中委會確認結果後先再講，宜家冇嘢補充喎！