六月底小朋友陸續考完試，又到咗各位家長最頭痛嘅日子──準備放暑假！要帶班小朋友去放吓電，最好不過係落樓下公園或者遊樂場啦。如果大家去過東京舊式住宅區，例如「都電荒川線」所經嘅地區都會見到一啲遊樂場，每樣遊戲設施都好有特色，部分仲有手繪公仔圖案。睇返香港遊樂場就千篇一律，據康文署資料顯示，截至去年尾全港有626個戶外兒童遊樂場，但大部分都係採用組合式遊樂設施，包括滑梯、鞦韆架等，即係話好似倒模型砌出嚟，仲要係一大嚿連埋曬，毫無特色可言。

不過，尖沙嘴新開咗一個不一樣嘅遊樂場，由街頭藝術團體Start From Zero，發揮創意用木工整咗一系列遊樂設施，仲可以體驗吓海邊玩韆鞦係咩滋味。

香港空間咁細，港孩功課咁忙，遊樂場同玩都變得越嚟越奢侈，Start From Zero就喺尖沙嘴海旁建造「Nature's Playground」，將自然元素同遊樂場結合，好似係金盞花韆鞦、蔬果蹺蹺板、天然擊樂隧道、自然小徑、Mr. Bones滑梯等等，而且全部都係用天然木材搭建，大人細路都可以免費入去玩。

Start From Zero嘅婷婷話，好多展覽用完嘅木材都會拆咗然後掉咗佢，好浪費，但其實啲木係可以回收再用，所以今次展覽遊樂設施係採用被遺棄或循環再用木材做出，而且展覽過後仲可以重用，例如「拼玩天然樂 (Nature's Scrabble)」其實係用超過100張木凳組成，當Playground完結後可以還原番一張張獨立木凳。

佢哋一向專注木藝創作，周不時會喺觀塘搞Workshop，婷婷做木工已經3年，覺得做木工都好似去咗遊樂場咁，因為由零開始製作一件木製品，好有滿足感。

Nature's Playground由6月20號至26號喺海港城海運大廈露天廣場開放，除咗玩仲可以參與木工工作坊，自製木門牌，喺上面吸A至Z印仔，每完成一塊，大會就會捐港幣20蚊畀護苗基金。

Nature's Playground
日期：6月20日至6月26日
時間：10:00am-10:00pm
地點：尖沙嘴海港城海運大廈露天廣場舉行
門票：免費進場
特別活動：自製木門牌，每完成一塊，會捐20元給護苗基金。每轉發網上捐款感謝咭一次，大會即捐出10元予護苗基金。
詳情網址： https://www.facebook.com/KiehlsHongKong
資料來源：Kiehl’s

費清＃要生計，也要生活＃毋忘初衷