韓國型男蘇志燮早前展開亞洲巡迴粉絲見面會，繼早前台灣場、雅加達場後，今晚蘇志燮就在九展舉行香港站演出。

由於蘇志燮事隔近一年再見港迷，所以粉絲都好熱情，他於晚上7時05分戴着黑超及穿上黑色西裝出場，一出場就獻唱英文老歌《Can't smile without you》，其間對觀眾揮手微笑，冧得台下港迷不斷大叫。唱完第一首歌後，蘇志燮就除下黑超，並以韓文同粉絲打招呼：「好耐冇見大家，自己都好激動，希望大家今日有個愉快嘅晚上。」蘇志燮更大冧粉絲表示揀選第一首歌的原因是因為歌詞中有句「冇你笑唔出」，所以才令他選擇來唱，但就謙虛表示自己唱得不太好。

唱完歌就進行第一部份問答環節，問到蘇志燮有冇食補充品的習慣時，他表示年紀到了，所以開始有食維他命。再問到想帶甚麼回韓國食時，蘇志燮都未回答，台下觀眾即幫手大叫：「男人的浪漫」，蘇志燮聽完繙譯解釋後就表示未試過食，反問是否食了對男性會好，如果是就可以一試。

提到早前拍攝劇集《我身後的陶斯》時，蘇志燮透露拍攝時都有少少辛苦，因為劇中與小朋友有不少對手戲，他說：「拍完劇後先明白做父母嘅辛苦，因為小孩子係唔會坐定定。」

之後就到粉絲問答環節，第一個粉絲上到台見到蘇志燮竟然忘記要問乜，蘇志燮即忍不住笑，並着對方慢慢回憶。粉絲問到蘇志燮點樣忘記不開心的事，蘇志燮就教路說：「唔好咁好記性就得，唔使擔心，有開心事就會忘記唔開心事，有乜唔開心諗起今日就會開心。」問完問題，粉絲就向蘇志燮做心心動作。

-------------------------
《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw
-------------------------
全港打工仔特約：Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef