舊年爆發金融海嘯，各地唔少金融業從業員都飯碗不保。不過中國嘅金融業從業員就得天獨厚，華華噚日睇《新浪財經》一篇報道，話雖然受市場影響，基金公司嘅年終獎發放數額已經回歸理性，但上海嘅基金從業員08年人均薪酬仍然超過70萬人仔，而6個月月薪做花紅，更加係行業嘅中位數。

人均年薪逾70萬人仔

報道仲引用咗一家銀行旗下嘅基金公司為例，話由於員工齊心努力，令公司地位喺行內明顯提升，所以老闆以20個月月薪作為年終獎嘉許一班員工。至於另一家上海知名合資基金公司，雖然舊年業績唔係咁突出，但年終獎一樣多過12個月人工。
不過，唔係間間公司都咁好景，報道話有幾家迷你型基金公司要減薪兩成至三成。
報道引述多位基金高層話，基金喺09年會面對好大困難，唔單止管理費收入有下降風險，仲要為早幾年嘅瘋狂擴張付出代價，所以要凍結招聘，但各位基金從業員絕對可以放心，因為呢班高層強調，始終基金業仍以人才為第一競爭力，行業中結構性裁員嘅可能性好細。