孝義兩難全，公民黨黨魁梁家傑03年起，年年7.1都有上街，噚日都有同其他泛民議員動員市民，但佢呼籲完大家遊行後，噚晚就飛咗去英國，出席大女大學畢業禮，下周二回港。
梁家傑大女喺劍橋讀政治，畢業禮7.1舉行，佢話幾經掙扎先決定與戰友分道揚鑣，做廿四孝老竇，「我同黨友傾過，佢哋都話應該去畢業禮」。梁家傑話離港期間，黨魁職務由主席余若薇兼任，呢次係佢03年以來，第一次缺席7.1遊行，「我太太三日前已經出發，我留到最後一刻先上機」。
呢頭動員市民上街，嗰頭自己卻離隊，梁家傑話希望唔會影響市民上街意欲。梁家傑女兒讀政治，有冇打算返港學以致用？梁家傑話冇聽聞女兒有興趣從政，唔排除繼續讀書，「或是如果有工作適合又有興趣，佢可能做幾年嘢，再讀番書，睇佢自己興趣啦」。