韓劇《懷抱太陽的月亮》35歲女星韓佳人與演員丈夫延政勛，於2005年結婚後一直都咁恩愛，兩人於去年4月升呢做父母。不過韓佳人仲未正式復出，所以老公延政勛就Keep住拍劇及演出綜藝節目賺奶粉錢。

而延政勛早前為綜藝節目《我家的熊孩子》任嘉賓，節目於今日播出，節目組就率先公開預告，延政勛就大談與韓佳人嘅日常生活。其實延政勛甚少演出綜藝節目，佢喺節目中就提到會演出《我家的熊孩子》係因為岳母，表示岳母鍾意睇呢個節目先決定演出。

延政勛率先表示因為要湊女，所以目前兩公婆同岳母一齊住。及後又指韓佳人雖然外表睇起嚟好文靜，不過其實佢都有反轉魅力：「太太都好活潑，一興奮就停唔到。」延政勛仲自爆以前曾經孖韓佳人及友人去夜店玩，結果玩得太開心唔捨得散，臨時一班人去咗釜山旅行。

延政勛又指自己有門禁，原先門禁係晚上12點，不過囡囡出世後，韓佳人就將門禁提早至晚上6點。延政勛又指老婆係欲擒故縱嘅高手：「如果過咗時間先返屋企，就限制身體接觸以示懲罰。」相當搞鬼。