正當唔少香港人為生活營營役役嘅時候，有一群義工就作出唔同嘅選擇。佢哋投身義務工作，發揮無私嘅精神，將關懷同愛心帶入社區。
話說中華基督教青年會（YMCA）「2004年程序服務義工獎勵計劃暨香港青年獎勵計劃」，噚日搞頒章禮，嘉許600多個表現出色嘅義工，邀請咗社會福利署署長鄧國威主禮，除咗頒發最高殊榮嘅「金章5年服務獎」，更同長者、青年人及兒童嘅義工代表真情對話。
鄧國威話，自己中學時已經做義工，其中印象最難忘係去大口環嘅兒童中心探訪殘障兒童，令佢深刻感受到呢啲兒童需要關懷，從而加強對義務工作嘅肯定。不過現時工作忙，冇時間做義工，鄧國威笑住咁話，等退休之後就會做番多啲。
（圖）鄧國威（右四）出席YMCA義工頒章禮，即場同義工代表真情對話。


傳真︰2623-9278
電郵︰[email protected]