西九龍文娛藝術區招標，政務司司長曾蔭權主持太公分豬肉儀式，一上場先將英資太古踢出局，理由係太古拒絕採用天蓬設計，將個西九龍綠化，整到好似個花園咁！

用花園包裝有乜唔好
咦，乜唔係廢董話要推動「環保港」咩？成個尖沙嘴，有幾多寸綠色，將個西九龍文娛藝術區用花園包裝，有乜唔好？定係以為特區係所謂嘅中國領土，以甚麼理由，歧視英資？若然係咁，特區又有乜資格自稱「國際城市」？
不過雖然太古出局，但英國影響力仍然強大，剩番三間爭，就第一號大熱門嘅長實同新地集團「活力星國際」，背後由英國大建築家諾曼科士打揸大旗設計，個天蓬設計到一條銀蛇咁，隔住維港對岸會展中心嗰隻大水魚，形成一個龜蛇對峙格，講到風水，就梗係最符合玄學上嘅要求。
第二號「香港薈萃」，係恒基兆業擔旗。恒基兆業本喺地產方面亦經驗豐富，不過可惜，喺發展文娛藝術方面，就似乎冇乜往績。隔籬新地，都話喺馬灣搞過一個「挪亞方舟」主題公園，由教會資助，有上帝押陣，舊約聖經照住，梗係好有荷李活史詩巨片嘅《十誡》feel，文化氣息勁到爆燈，（不過後來大計撻Q，原因不明，究竟點解，神迹未能出現，似乎應該問吓耶和華嘞），老細李兆基，從來未曾聽講過佢鍾意睇白雪仙唱粵劇，或者情迷鳳凰女呀咁，會唔會喺文娛藝術方面嘅資歷淺咗少少，都當西九龍係一個五餅二魚式嘅種金聚寶盆呢？