【請無綫食檸檬】唔知男友有幾多身家 Anjaylia:唔排除閃婚
陳嘉寶Anjaylia
陳嘉寶(Anjaylia)回復自由身後即獲無綫邀請加盟,但被佢拒絕
入行9年嘅陳嘉寶(Anjaylia)剛與舊公司約滿,回復自由身後即獲無綫邀請加盟,但被佢拒絕,Anjaylia解釋﹕「其實好感激,唔係嗰兩部劇(《女人俱樂部》和《殭》)都唔會咁多人認識我,佢哋(無綫)都有人傾偈,問我想做乜,但自己心底嘅夢想係拍電影,所以想用最直接嘅方式去試。」
Anjaylia,問到是否有半億身家嘅圈外男友黃頌祈撐腰?佢話﹕「唔係,其實我真係唔知佢有幾多身家,我同佢拍拖冇耐,都有人問過佢揸咩車,我咪答七人車囉。你哋講嘅家族物業,我都係睇雜誌先知,問佢,佢就話『一啲啲啦』。」Anjaylia與男友都是虔誠教徒,對「處女黨」之名亦感無奈,佢話﹕「唔尷尬就假啦,但都答到唔尷尬。因為呢行乜都畀人問,咁我答就答咗,唔信都冇法,等讀者自行想像啦。」問到男友有冇求婚?Anjaylia衝口而出話﹕「佢分分秒秒都求婚,哈哈,你當自我幻想啦,其實我都唔排除閃婚,因為結婚生仔係人生軌跡,而我啲fans仲好希望我可以快啲有人照顧到我。」
而o靚模出身嘅Anjaylia最近與林皓霆推出新書《BEHIND the SCENE》,大爆o靚模辛酸史。佢話﹕「有朋友試過見工,對方要求佢影nude,呢啲真係唔好信。我又試過被相熟o靚模朋友呃,叫我撐佢間餐廳開張,點知原來係一啲飯局,好彩去之前識穿咗,唔係懵查查去咗都唔知。」