馬刺控衞柏加（Tony Parker）喺上季季後賽受傷，左腿四頭肌腱撕裂而提早收「咧」，不過馬刺周三發表聲明，將呢位35歲老將下放到發展聯盟嘅奧斯汀馬刺。

柏加喺周三、五都會參加喺聖安東尼奧嘅訓練營，佢完成周三嘅操練後，仲向《The Undefeated》透露想趁機回復狀態，不過就未有復出時間表。據悉醫生喺九月已經批准柏加落場打波，但呢位馬刺控衞表示：「我希望過多兩個月，操弗啲先復出。」